ৰাভা ব্যাপ্তিষ্ট কনভেনচননি বৗন্দৗলৗমসা ইতিহাস

ৰেভাঃ অনন্ত কুঃ সুম্ব্রী

দেবীতোলা

ফোন: ৯৯৫৪২৯৩৮১৮

১। ইউনিয়ন দৗমতানিঃ

          পয়সত্তৰ বৗসৗৰ গানা অৗগচাকৱাই ৰাভাদোনি মাজাৰাই কালভান্ধাৰী সঙাই খ্রীষ্টিয়ান সাইতানা ব্রাকৗইমৗন দাসমানবেনেনবান উ দিনাইঙি ইতিহাসদো পেনেমসা সুকৗইমৗন তান মাঞ্চান গৗমৗন দাসমাঞ্চৌ। সাকসা মৗংনিং মাৰাবদোনাইপ্রিং দাসমান গানাৰৗন প্রায় ৩০ টা গানা পৰিয়াল তৗক্রৗই বৗসৗৰাইপ্রিং খ্রীষ্টনাই বিশ্বাস গাসাইমৗন পাংতানামৗন। পুৰানা পানবাৰীয়াই সাকসা গাৰো পামুং তৱা। উনি মুং ৰুসাং পামুং মানে ৰুসাং পালক। উম্রা খ্রীষ্টিয়ান ধৰম লাইতানি মাৰাব। অৗগিনাই কোচা-ৰাভা হিন্দু মাজাৰাই মুশু কৗশি গাসাই মাঞ্চা। মুশু কৗশি গাসাইৰৗন উম্রা হিন্দু দংচা ব্রাকৗইমৗন ব্রাঙি সাইতানা। গাৰো ৰুসাং পামুংঙা মুশু কৗশি গাসায়া। যি মাৰাবদো উনি দ্বাৰাই মুশু কৗশি গাসায়া অনোক খ্রীষ্টিয়ান সাই জকা। উ পামুংঙৗন অনোকো চৗইতানা আৰা যত্ন গাসাইমৗন তৗক্রৗই দিন লাগেত চলাইফৗইতানা। অনোক গাৰো গীর্জ্জাং লৗইয়া। উম্প্রিং উ ৰুসাং পামুংঙা চিনি জিকৗমাই কুনু চলাইম্রা তংচৗইমৗন, পাষ্টৰ তংচৗইমৗন মাৰাব দৗগ্রৗম্মি, বিয়ৌদো লাওঙি বিশেষ কৗমদো চলাইঙি অসুবিধা নৗকৗইমৗন, উপায় তংচৗইমৗন তৗক্রৗই টাকা পৗশি গাজাপৗইমৗন আবাৰ সাংসাৰিকৱাং বালনাং নিগিনি সাইতানা। উ দিনাই খ্রীষ্টিয়ান সাইৰৗন আতাং জৗতি সায়া ব্রাকৗইমৗন মনে গাসায়া। উনান আবাৰ হিন্দু দুং নিগাৰৗন জৗতি চকঙি মানে কোচা সাইঙি গৗমৗন ৰুংতাম টাকা আৰা বাগ মাংসা লাওমৗন উদ্রাই নিগা।

          উ দিনাই খ্রীষ্টনাই বিশ্বাস তানমৗন চলাইতানি মাৰাব মৗংনিং তৱা। অনোক সায়ৌ শ্রী কামাখ্যা ৰাভা আৰা শ্রী গনেশ চন্দ্র ৰাভা। এনোক খ্রীষ্টিয়ানাইপ্রিং সাংসাৰিকৱাং লৗই জিকৗমাইবান অনোঙি মনাই খ্রীষ্টনি পাতাং পেনেম মান্নিয়াইপ্রিং দাবাল মাঞ্চৌ। আৰা উ বিশ্বাস লাইমৗন জ-জৰাই উপাইমৗন শ্রী কামাখ্যা ৰাভাৱা ডিংডিঙা কৗতৗইঙি লুথাৰেণ মিছনাং লৗইমৗন উবাই তৗক্রৗইদিন কৗম তৗৰৗইমৗন পাঙৌ। উপ্রিং উবাইপ্রিং টুক্রাঝাৰ বড়ো ইউনিয়ন মিছনাৰীদোনাই সকায়ৌ। উ সময় উনি মিচিক আৰা স্বাবৗন্তৗই সাকসাৱো নৗগৌৱাই তান্তৗইতানা, উবাই আতাং মাৰাবদো শুংশুংতানা যে উম্রা মিচিক আৰা স্বাৱো বাকাইমৗন জৗৰৌ। নাত্নে বৗসৗৰনিং-বৗসৗৰতাম উবাই কৗম তৗৰৗইঙি জিকৗমাই উনি মিচিক আৰা স্বাবৗন্তৗই সাকসাৱোবান অৗগ্রৗম লালাঙৌ।

          পাসাংতিয়া শ্রী গনেশ ৰাভাবান সাংসাৰিকৱাই তয়তোং সময়াই জ-জৰাই উপায়মৗন শান্তিনি লাম লামৗইমৗন বংচৗইমৗন লেখা পঢ়াইঙি তৗনৗকৗইমৗন টুৰা গাৰো হৗচুৰাং জৗৰনাঙা। উবাই লেখা পঢ়াইমৗন আৰা যোৰহাট ইংলিচ মিডিয়ামাই ৯ম শ্রেণী লাগেত পঢ়াইমৗন বাঘপাৰা গাৰো ব্যাপ্তিষ্ট চার্চ ইউনিয়নাই তৗৰৗংগীৰ গৗমৗন কৗম তৗৰৗইঙি চঙা। তৗৰৗংগীৰ কৗম তৗৰৗইমৗন তয়তোং সময় সাকসা গাৰো তৗৰৗংগীৰজুমৗন উম্রা বিয়ৌ সায়া। কয়-এক বৗসৗৰ তৗৰৗংগীৰ কৗম তৗৰৗইঙি জিকৗমাই তৗৰৗংগীৰ কৗম বাকাই লাওমৗন গাৰো ইউনিয়নাই ঈশ্বৰনি পেনেম ক্রৌ প্রচাৰ গাসাইঙি প্রচাৰক আৰা পাষ্টৰ হিচাৱাই মণ্ডলীদাই কৗম তৗৰৗয়া।

          শ্রী কামাখ্যা ৰাভাৱা টুক্রাঝাৰ বড়ো ইউনিয়নাই পাং বেনেনবান অৗপিন জৗতিনি ভৗই-জিনৌদো হেঙান দাবানমৗন লৗইচান। উম্রা উবাই পাং বেনেনবান মাজাৰ মাজাৰ নৗগৌৱাং ফৗইতানা আৰা প্রভুনি ক্রৌদো প্রচাৰ গাসাইতানা। ইগিন গানা চেষ্টা গাসাই গৗমৗন, ৫ ফেব্রুৱাৰী ১৯৫৭ চনাই মঙ্গলবাৰ চিনিং দেবীতোলা অঞ্চলাইঙি কোচা-ৰাভা সমাজাই গণ্য-মান্য মানাইনাং মাৰাবদোনাইপ্রিং বিশেষ অনুমতি মানমৗন, বর্ত্তমান মিচন ফুকাই গসা মাইচাম হামপ্রেং নৗগৌ পৗৰৗইমৗন লাইমৗন চিকিৎসা কৗম চঙা। উ সময়াই বাঘপাৰাইঙি মিচনাৰী ৰেভাঃ এন. এ. কার্কুড আৰা মিচেচ কার্কুড অনোক সপ্তাহই লাবসা ফৗইমৗন চিকিৎসা কৗম চলাইতানা।

          ১৯৫৭ চনাইঙি মার্চ নাৰেত লাগেত নৗগৌ হাম্মি কৗম বুসুনৗইচা বেনেনবান মার্চ নাৰেতনি দ্বিতীয় সপ্তাহৱাই সাত সাগৰ তেৰ চিকাঝোৰ পাতৗইমৗন অষ্ট্রেলিয়াইপ্রিং ৰেভাঃ গ্লাসবী সাহাবা ৰাভাদোনি মাজাৰাই মিচনাৰী হিচাবাই কৗম তৗৰৗইঙি  গৗমৗন স্বাবৗন্তৗই মৗংনিং আৰা অৗপিন মিচিকৱো অৗগ্রৗম লাইমৗন টুক্রাঝাৰাই সকফৗয়া। ই মিচনাৰীয়ৗন প্রথমাই গাৰো আৰা বড়ো ইউনিয়নাই কৗম তৗৰৗইতানা। অষ্ট্রেলিয়াইপ্রিং ফৗইমৗন টুক্রাঝাৰাই সপ্তাহ অৗংনিং পাঙাইমৗন ১৯৫৭ চনাইঙি এপ্রিলনি ১ তাৰিখ চিনিং দেবীতোলা মিচনাই সকফৗয়া। উম্রা ফৗইমৗন প্রথমাই নৗগৌ হাম্মি কৗম দৗপ্রৗতনি গৗমৗন চেকেঙাই লাআ আৰা নৗগৌ হাম্মি কৗম প্রৗতচা লাগেত মিচিক আৰা স্বাবৗন্তৗই মৗংনিঙো গ্রাহামপুৰ লুথাৰেণ মিচনাই তানাইমৗন ফৗয়া। নৗগৌ হাম্মি কৗম দৗপ্রৗতনিমৗন অৗগ্রৗম উ নৗগৌৱায়ৗন চিকিৎসানি কৗমবান চলাইমৗন পাংতানা আৰা চিকিৎসানি কৗম ৰেভাঃ গ্লাসবী আপৗন চলাইতানা। আতাংনা ব্রাকাৰৗন উম্রা ইবাই ফৗইঙি অৗগচাকৗন চিকিৎসা কৗমনি গৗমৗন বিশেষ ট্রেনিং মান ফাইতানা। ই চিকিৎসা কৗম চঙি লৗ-লৗগৗং পি-পিজানাইঙি মাৰাবদোবান ফৗইমৗন চিকিৎসা লাইতানা।

          জিকৗমাই জুলাই আৰা আগষ্ট নাৰেতৱাই নৗগৌ হাম্মি কৗম দৗপ্রৗতৗইমৗন ছুটিনি গৗমৗন শ্বিলংঙাং লৗয়া আৰা উ সময়াই অনোঙি তৃতীয় স্বাবৗন্তৗই জনম সায়া। সেপ্তেম্বৰ নাৰেতৱাই শ্বিলংঙাইপ্রিং বালফৗইমৗন দৗৰদৗৰ পাংফৗয়ৌ। উ সময়াই ডিছপেনসাৰী নৗগৌ তংচৗইমৗন মিচন পুমায়ৗন পৗমৗৰসা গসা তৗম্বু তাৰাংমৗন উবায়ৗন চিকিৎসানি কৗম চলায়া। মিচেচ গ্লাসবীয়া ফার্ম্মাছীচ পাচ গাসাইতানা গৗমৗন চিকিৎসা কৗমাই যথেষ্ট সহায় সাইতানা। ইগিন গানা চলাইমৗন পাংতোঙি সমায়াই ৰুববাৰ দৗকৗন অনোক অৗগ্রৗম কৰং-কৗতৗইঙি সংদাই ঈশ্বৰনি পেনেম ক্রৌদো প্রচাৰনি গৗমৗন লৗইতানা। বিবা সময় সঙাইঙি অৗদৗগ গদা মানাইনাং মাৰাবদো প্রজেক্টৰ আতাদো তৗনৗং গৗমৗন অনোকো কালাংতানা। ই সুযোগায়ৗন ৰেভাঃ গ্লাসবীমৗন বেতেৎ জিন্নি তৗক্রৗয়ৗন সুবিধা মান্তানা। উ সময়াই টুক্রাঝাৰাইপ্রিং শ্রী কামাখ্যা ৰাভা, ৰেভাঃ সুবিদাৰ বৰগয়াৰী আৰা ৰেভাঃ আগনসিং নার্জাৰী এনোক ফৗইমৗন প্রজেক্টৰ আতাদো তৗনৗকৗইমৗন ঈশ্বৰনি পেনেম ক্রৌ দুন্নাই তৗক্রৗই সহায় গাসাইতানা।

          জিকৗমাই ১৯৫৯ চনাইঙি ৬ মে নাৰেতৱাই তৗক্রৗই দিন অৗগচাক খ্রীষ্টান সাইমৗন বালতানি ৬ টা পৰিয়ালদো  মন তালাইমৗন আবাৰ খ্রীষ্টনাই ফৗয়া। এনোক সায়ৌঃ- ১। শ্রী সুজেন ৰাভা আৰা পৰিয়াল, ২। শ্রী প্রেমেশ্বৰ আৰা পৰিয়াল, ৩। শ্রী সংকিল ৰাভা আৰা পৰিয়াল, ৪। শ্রী বদেশ্বৰ ৰাভা আৰা পৰিয়াল, ৫। শ্রী পুতিৰাম ৰাভা আৰা পৰিয়াল, ৬। শ্রী নিজেন্দ্র ৰাভা আৰা পৰিয়াল।

          উমৗন অৗগ্রৗম ৰেভাঃ খগেন বানবক পিদান খ্রীষ্টৱো বিশ্বাস গাসাইমৗন বাপ্তিষ্ম লাইমৗন মণ্ডলী ভুক্ত সায়া আৰা অনোঙি দ্বাৰায়ৗন ১৯৫৯ চনাই পিদান ৰূপে প্রথম কালভান্ধাৰী মণ্ডলী বানাইঙি সায়া। নাত্নে ই মণ্ডলী বানাইঙাই, সমাজাইপ্রিং দিগ্রৗইমৗন নানাৰকম তাড়ণা মাসবেনেনবান খ্রীষ্টনাই অনোক যি বিশ্বাস উৱো হেঙান ললাকতিন মাঞ্চৌ। ই পৗমৗৰসা মণ্ডলীয়ো আত্মিক শিক্ষা আৰা আত্মিক বৗল লাও গৗমৗন টুক্রাঝাৰাইপ্রিং মিচিক মিচনাৰী মিচ্ হৰউদ আৰা পিৰাই ব্রাকৗইমৗন ফৗইতানি শ্রী কামাখ্যা ৰাভা, ৰেভাঃ সুবিদাৰ বৰগয়াৰী আৰা আগনসিং নার্জাৰী অনোক ৰুববাৰ দৗকৗন ফৗইমৗন গীর্জাদো চলাইঙি যথেষ্ট সহায় গাসায়া। উনি বৗৰাইবান বাঘপাৰা গাৰো ইউনিয়নাইঙি মিচনাৰী ৰেভাঃ কার্কুড চাহাব, মিচ্ জে. হেৰী আৰা ৰেভাঃ মহিন্দ্র মাৰাক, ই পিদানসৗন দৗমতানি মণ্ডলীয়ো যথেষ্ট উৎসাহ লাওতানা। উনান গৗমৗন আং অনোঙা ধন্যবাদ লাওৱাং। ই পিদানসৗন দৗমতানি মণ্ডলীয়ো বিশেষ যত্ন লান গৗমৗন মাষ্টাৰ শ্রী খগেন বান্ধাবকৱো পালক বানাইঙি সায়া আৰা কয়এক বৗসৗৰ পালক কৗম তৗৰৗইঙি জিকৗমাই বড়ো ইউনিয়নাইঙি ৰেভাঃ চুবদাৰ বৰগয়াৰীনি দ্বাৰাই অর্ধিনেচন লাওঙি সায়া।

          ১৯৫৯ চনাইঙি বুসুন পাতাং শ্রী সত্যেন চাপাৰ আৰা পৰিয়াল, শ্রী সুবল ৰাভা আৰা পৰিয়াল, শ্রী অদেশ চন্দ্র ৰাভা, শ্রী ভবেন ৰাভা, শ্রী অনুকুল ৰাভা, শ্রী জগদ্বীশ চন্দ্র ৰাভা, শ্রীমতী সুমতী কামা, শ্রী নবীন চন্দ্র ৰাভা অনোক খ্রীষ্টৱো অৗপিন ত্রাণকর্তা ব্রাকৗইমৗন লাআ আৰা মণ্ডলী ভুক্ত সায়া। অনোকমৗন অৗগ্রৗম তৗক্রৗই দিন অৗগচাক খ্রীষ্টিয়ান সাইমৗন পাংতানি শ্রী নিৰাম আৰা উনি পৰিয়াল মণ্ডলী ভুক্ত সায়া।  উম্রা খ্রীষ্টৱো গৗবৗকৗইমৗন লানাই সমাজাইপ্রিং দুইগুন তাড়না মাসা। নাত্নে অনোঙি খ্রীষ্টনাই যি বিশ্বাস উৱো কুনুদিনাই তলাক মাঞ্চৌ। দিন দিন বৃদ্ধি সাইমৗন পাঙৌ। ইগিন গানা আমবাৰী সঙাইপ্রিং শ্রী নৰকেশ্বৰ ৰাভা আৰা পৰিয়াল, শ্রী ধীৰেন ৰাভা আৰা পৰিয়াল, শ্রী ৰগেন ৰাভা আৰা পৰিয়াল, দেবীতোলা-শালবাৰী সঙাইঙি শ্রী অবনী মহোন ৰাভা আৰা পৰিয়াল, শালবাৰী সঙাইঙি শ্রী বসাৰাম ৰাভা আৰা পৰিয়াল খ্রীষ্টৱো বিশ্বাস গাসাইমৗন বাপ্তিষ্ম লান জিকৗমাই মণ্ডলী ভুক্ত সায়া আৰা কালভান্ধাৰী সঙাই গসা গদাগৗক মণ্ডলী সাইঙি চঙা। ই মণ্ডলীয়ো হাতীবান্ধা সঙাই সাইৰৗন বেবাক মাৰাবনি গৗমৗন মাজাৰ সাইঙা ব্রাকৗইমৗন গীর্জ্জা নৗগৌৱো লাহাইমৗন বানায়ৌ। নাত্নে উৱো দলমাকা সঙাইসে মণ্ডলী গাচাপমি সায়ৌ। কয়এক বৗসৗৰ অৗগ্রৗম গীর্জ্জা দুং জিকৗমাই ১৯৬৯ চনাই কালভান্ধাৰী আৰা হাতীবান্ধা অৗংনিং মণ্ডলী বানাইমৗন ককদেঙি সায়ৌ। ই আমায় মণ্ডলীদাইপ্রিং ১৯৭০ চনাই আমবাৰী ১৯৭৫ চনাই দেবীতোলা গোসেন মণ্ডলী, ১৯৭৬ চনাই শালবাৰী মণ্ডলী আৰা ১৯৮৩ চনাই হাতীবান্ধা মণ্ডলীঙি ডালায় দলমাকাৱো, দলমাকা মণ্ডলী হিচাবাই স্বীকৃতি লাওঙি সায়া।

          ১৯৬০ চনাই দেবীতোলাইপ্রিং প্রায় ৫০ মাইল পিজানাই সাপকাটা সঙাই খ্রীষ্টনি পেনেম ক্রৌ প্রচাৰ গাসাইঙি গৗমৗন বিশেষ কালাং মাসানি সায়া। শ্রী অনুকুল ৰাভাৱা প্রথম উবাই পেনেম ক্রৌনি লালাংগীৰ হিচাবাই কৗম তৗৰৗইয়া আৰা ৬ টা পৰিয়ালা খ্রীষ্টনাই বাপ্তিষ্ম লাআ, অনোক সায়ৌঃ- শ্রী মহেন চাপাৰ আৰা পৰিয়াল, শ্রী অতুল চন্দ্র ৰাভা আৰা পৰিয়াল, শ্রী উপেন ৰাভা আৰা পৰিয়াল, শ্রী যোগেন ৰাভা আৰা পৰিয়াল, শ্রী তোপলসিং ৰাভা আৰা পৰিয়াল, আৰা শ্রী ৰায় মোহন ৰাভা আৰা পৰিয়াল। উন জিকৗমাই লাপসিয়ৗন ৭ টা পৰিয়াল খ্রীষ্টৱো বিশ্বাস গাসাইমৗন বাপ্তিষ্ম লাআ। ইগিন গানা সাপকাটাই গসা মণ্ডলী সায়ৌ আৰা ৰাভা ব্যাপ্তিষ্ট ইউনিয়নমৗন মণ্ডলী হিচাবাই লান সায়ৌ। ই মণ্ডলীঙি পৰথম পালক সায়ৌ শ্রী মহেন চাপাৰ। কয়একদিন পালক কৗম তৗৰৗইঙি জিকৗমাই উৱো ৰাভা ইউনিয়নাইঙি পাষ্টৰ হিচাবাই কৗম তৗৰৗইঙি গৗমৗন অর্ডিনেচন লাৱা।

          ১৯৬২ চনাই ৰেভাঃ আৰা মিচেচ গ্লাসবী সাহাব ৰোং প্রথম টার্ম দুসুনমৗন নেন্তাংনা গৗমৗন  আপ্রোং দেশাং লৗইঙাই ৰেভাঃ আৰা মিচেচ জে. ওৱাটাৰশ্বন চাহাবা বৗসৗৰ গসানি গৗমৗন ৰাভা ইউনিয়নাই মিচনাৰী হিচাবাই কৗম তৗৰৗয়া। বর্ত্তমান তয়তোঙি মিচনাই নৗগৌ পিলৌৱো উম্রা আপৗন বানাইতানি। ৰেভাঃ আৰা মিচেচ গ্লাসবীৰোং বৗসৗৰ গসা নেন্তাকৗইমৗন আবাৰ বালফৗইমৗন ৰাভাদোনি মাজাৰাই ১৯৬৬ চনাইঙি ফেব্রুৱাৰী নাৰেত লাগেত পাংমৗন পৰিয়ালমৗন অৗগ্রৗম আপ্রোং দেশাং বালনাঙৌ। ই মিচনাৰীয়া সমাজ সেৱক হিচাবাইবান বিশেষ কৗমাই উল্লেখ গাসাইতানি নৗকা। উম্রা খ্রীষ্টনি পেনেম ক্রৌনি বৗৰাইবান সাকসা আশীর্ব্বাদনাং খ্রীষ্টান নেতা/টাংগাম হিচাবাই তৗনৗং গৗমৗন আপ্রাণ চেষ্টা গাসাইতানা। কোচ-ৰাভাদোনি সভা সমিতিদাই প্রয়োজন বশতঃ অৗপিন গৗড়ী লাওমৗন মাৰাবদো লালাংঙি লাফানি কৗমাই সহায় গাসাইতানা। ই মিচনাৰীয়ৗন স্হানীয় দেবীতোলা চৰকাৰী  হাই স্কুলাইঙি কৗমন্যাচল হিচাবাইবান বৗসৗৰ গসা কৗম তৗৰৗইমৗন স্কুলো গুদুং গৗমৗন খৗব দাক্রাইতানা।

          ১৯৬৬ চনাইঙি ফেব্রুৱাৰী নাৰেতৱাই ৰেভাঃ গ্লাসবী আৰা পৰিয়াল গোৱালপাৰা ৰাভা ব্যাপ্তিষ্ট চার্চ ইউনিয়নাইপ্রিং বিদায় লাইমৗন অৗপিন দেশাং বালনাঙা। এনোক লৗইঙি জিকৗমাই ৰেভাঃ কার্কুড চাহাব আৰা পৰিয়ালা গোৱালপাৰা ৰাভা ব্যাপ্তিষ্ট চার্চ ইউনিয়নাই কৗম তৗৰৗই গৗমৗন ফৗয়ৌ আৰা গোৱালপাৰা ৰাভা ব্যাপ্তিষ্ট চার্চ ইউনিয়নাই মিচনাৰী কৗমভাৰ লাআ। ই মিচনাৰীয়া বৗসৗৰনিং মানে ১৯৬৯ চন লাগেত গোৱালপাৰা ৰাভা ব্যাপ্তিষ্ট চার্চ ইউনিয়নাই কৗম তৗৰৗইমৗন অৗপিন দেশাং বালনাঙা। মিচেচ কার্কুডনি আচল কৗম সায়ৌ মণ্ডলীদাই চাণ্ডেস্কুল উন্নতি গাসাইঙি। উনান গৗমৗন অনোক লৗইঙি সময় লাগেত মণ্ডলীদাই চাণ্ডেস্কুল পেনেমসা চলাইমৗন তয়তানা।

২। অষ্ট্রেলিয়ান ব্যাপ্তিষ্ট মিচনাৰীদো লৗইঙি জিকৗমাই ইউনিয়ননি কৗমঃ

          ১৯৬৯ চনাই অষ্ট্রেলিয়ান ব্যাপ্তিষ্ট মিচনাৰীদো লৗইঙি জিকৗমাই গোৱালপাৰা ৰাভা ব্যাপ্তিষ্ট চার্চ ইউনিয়ননি সম্পুর্ণ দায়িত্বনি ভাৰ জোৰাম ব্যাপ্তিষ্ট মিচননি চেকেঙাই গৗথৗই লাওমৗন লৗয়া। ১৯৬৮ চন জুন নাৰেতনি ৮ কালাৰাই ৰেভাঃ আৰা মিচেচ ৰোখামা জেদ. বি. এম. পৰথম মিচনাৰী হিচাবাই গোৱালপাৰা ৰাভা ব্যাপ্তিষ্ট চার্চ ইউনিয়নাই কৗম তৗৰৗই গৗমৗন ফৗয়া। উনি দিনাইপ্রিঙৗন ইউনিয়নাই জ-জৰাই উন্নতি সাইঙি চঙা আৰা পেনেমৗন মণ্ডলী বৃদ্ধি সায়া।

          অষ্ট্রেলিয়ান ব্যাপ্তিষ্ট মিচনাৰীদো লৗইঙি জিকৗমাই ৰেভাঃ ৰোখামা ইউনিয়ননি কৗম তৗৰৗইঙি মাৰাবদোনি গৗমৗন লাম-চাম লাওঙি গৗমৗন চিন্তা গাসাইমৗন, কমিটিয়াই সাওৰাইঙি সায়া আৰা চঙি গৗমৗন পাষ্টৰদোনি  গৗমৗন  ৭৫ টাকা আৰা প্রচাৰকদোনি গৗমৗন ৫০ টাকা নাৰেত দৗকৗন লাম-চাম লাওঙি ব্যৱস্হা লান সায়া।

          ৰেভাঃ গ্লাসবী, ৰেভাঃ কার্কুড আৰা ৰেভাঃ ৰোখামানি দিনাইপ্রিং তি লাগেত আসামাই মুঠ ৩৮ টা মণ্ডলী সায়ৌ।

৩। বেঙ্গল ফালাং ঈশ্বৰনি ক্রৌ প্রচাৰ গাসাইঙি কৗমঃ

          ১৯৭৬ চনাই আমলাইগুৰী মণ্ডলীয়াই ৰাভা ব্যাপ্তিষ্ট চার্চ ইউনিয়ননি যুবক-যুবতি সভাই মেন্দাবাৰী সঙাইপ্রিং শ্রী যাত্রাসিং আৰা শ্রী সুবিদাস ৰাভা এনোক মৗংনিং ফৗইতানা। উ সভাইপ্রিং অনোক মৗংনিং ৰাসানদু বেঙ্গল ফালাংঙি মেন্দাবাৰী সঙাই ঈশ্বৰনি পেনেম ক্রৌ প্রচাৰ গাসাইঙি গৗমৗন কালাঙা। উ কালাং মাসান জিকৗমাই ১৯৭৭ চনাই শ্রী অমিয় কুমাৰ ৰাভা ৰাসানদু বেঙ্গল ফালাং প্রচাৰক হিচাবাই বাসাই মাসা। উম্রা উবাই আপৗইসা দিন পাঙৗইমৗন প্রচাৰ গাসাইঙি গৗমৗন উ বৗসৗৰায়ৗন অক্টোবৰ নাৰেতৱাই শ্রী যাত্রাসিং ৰাভা, শ্রী সুবিদাস ৰাভা আৰা পৰিয়াল, উম্প্রিং সঙাইঙি কয়একজন মুঠ ২৫ জন-জনী সানসায়ৗন ব্যাপ্তিষ্ম লাআ। উ আনন্দনি দিনাই যোগদান লাও গৗমৗন ঘাকসা মণ্ডলীয়াইপ্রিং শ্রী অমৰসিং কোচ, শ্রী সামদা ৰাভা, শ্রী মোহিনী আৰা পাষ্টৰ সুশীল কুমাৰ ৰাভাবান লৗইতানা। উনি আপৗইসা দিন জিকৗমাই শ্রী মনী ৰাভা পাৰেমৗন (গাওবুঢ়ামৗন) অৗগ্রৗম তৗক্রৗই মাৰাব খ্রীষ্টৱো বিশ্বাস গাসাইমৗন ব্যাপ্তিষ্ম লাআ। ই মণ্ডলীয়াইপ্রিঙৗন তেপ তেপ খ্রীষ্টনি চৗথৗং পালাকৗইমৗন লৗয়া আৰা ১৯৭৮ চনাই খুৰমাইবস্তী আৰা খোয়াৰবাৰী অৗংনিং মণ্ডলী দৗমা। ইগিন গানা পেনেমক্রৌ প্রচাৰ গাসাইমৗন ৰাসানদু বেঙ্গল ফালাং তি লাগেত ৩০ মণ্ডলী সায়ৌ।

৪। ৰাসান পাক গাৰো হৗচুৰাই ঈশ্বৰনি ক্রৌ প্রচাৰ গাসাইঙি কৗমঃ

        ৰাসান পাক গাৰো হৗচুৰাই ঈশ্বৰনি ক্রৌ প্রচাৰ গাসাইঙি কৗমাই শ্রী অমৰসিং কোচ, ধাৰাবাহিক ভাবে ৰিবাইবেল প্রগ্রাম গাসাইমৗন ২৮ চেপ্তেম্বৰ ২০০১ চনাই দাগাল নৱাপাৰাইঙি শ্রী অজয় ৰাভা আৰা পৰিয়াল আৰা সঙাইঙি নগব্রি অৗগ্রৗম সাইমৗন ব্যাপ্তিষ্ম লাআ। উ চিনিঙৗন ৰাভা ব্যাপ্তিষ্ট কনভেনচন মুঙাই গসা মণ্ডলী দৗমা ৰাসান পাক গাৰো হৗচুৰাই। আৰা কৗতৗইঙি থাপা দাংগ্রি সঙাইঙি শ্রী কালেশ্বৰ ৰাভাৱা অৗপিন পৰিয়ালমৗন আতাং নগতাম মাৰাব লাইমৗন ব্যাপ্তিষ্ম লাআ ১২ অক্টোবৰ ২০০১ চনাই, উম্প্রিং মণ্ডলী হিচাবাই স্বীকৃতি লাৱা। ৰাসান পাক গাৰো হৗচুৰ, মেঘালয়াই পেনেম ক্রৌ প্রচাৰ গাসাইঙি গৗমৗন ২ টা মণ্ডলী সায়ৌ।

৫। চিকিৎসামৗন সেৱা কৗমঃ

        ১৯৫৯ চন লাগেত ৰেভাঃ আৰা মিচেচ গ্লাসবীয়া চিকিৎসা কৗম চলাই ফাইতানা যদিওঁ জিকৗমাই উ চিকিৎসানি কৗম বিশেষ দৰকাৰ সাইমৗন ফৗইঙাই ১৯৬১ চনাই মিচ বি. মেকডনাল্ড ফৗইমৗন বেবাক ভাৰ লাআ। উম্রা ফৗইঙি সময়াই ক্রাংসা আনৗওসৗন হাম্প্রেং নৗগৌনি ডিচপেনসাৰী বানাইঙি সাইতানা আৰা ১৯৬৫ চনাই বর্ত্তমান নৗকতোঙি ডিচপেনসাৰী নৗগৌ বানাইঙি কৗম দৗপ্রৗতানা।

          মিচ বি. মেকডনাল্ড সাকসা ভদ্র আৰা ধৈর্য্যনাং মিচিক সায়া। চিকিৎসা কৗমাই উম্রাজু খৗব কাপা। ই পেনেম খৗব কাপমি মিচিক মিচনাৰীয়ো ১৯৭০ চনাইঙি ১৩ তাৰিখ চেপ্তেম্বৰ চিনিং ৰাভা ইউনিয়নাইপ্রিং বিদায় লাওঙি সায়া আৰা ২১ তাৰিখ চিনিং অৗপিন দেশাং লৗয়ৌ।

          অষ্ট্রেলিয়ান ব্যাপ্তিষ্ট মিচনাৰীদো লৗইঙি অৗগচাক মেডিকেলনি দায়িত্ব ZBM মিচনাৰীদোনি চেকেঙাই ভাৰ লাওমৗন লৗয়া। উম্প্রিং সময়মতে মিজোৰামাইপ্রিং কম্পাউণ্ডাৰ হিচাবাই ফৗয়ৌ ফার্ম্মাছীচ কে. কাপখিমা, চিষ্টাৰ দাৰোপুইয়ি, চিষ্টাৰ ৱানচুঙি, চিষ্টাৰ জোৰামটাংঙি আৰা চিষ্টাৰ এফ. খোলময়ী নাৰ্চ। তি RBC ৱাই ২ টা ডিচপেনসাৰী তৱা, গসা দেবীতোলাই (আসাম) আৰা গসাৱো মেন্দাবাৰীয়াই (ৰাসানদু বেঙ্গল)।

৬। ৰাভা ব্যাপ্তিষ্ট চার্চ ইউনিয়নাই মিচিক আমায়দোনি কৗমঃ

        ৰাভা ব্যাপ্তিষ্ট চার্চ ইউনিয়ন অৗগচাকৱাই অষ্ট্রেলীয়ান মিচনাৰী মিচেচ গ্লাসবি, মিচেচ কার্কুড আৰা মিচ মেকডোনাল্ডৰোং কষ্ট গাসাইমৗন কোচা খ্রীষ্টিয়ান মিচিক হাঞ্জাৱো বানাই লাওতানা ১৯৬২ চনাইঙি ২৬ অক্টোবৰাই। উনি জিকৗমাই ১৯৬৮ চনাইপ্রিং  জেদ. বি. এম. মিচনাৰী ৰেভাঃ ৰোখামা আৰা উনি মিচিক মিচেচ লালৰোচামি আৰা মিচেচ দাৰৰোপুই, মিচেচ ভানচুঙি, মিচেচ কলময়ী আৰা মিচ জোৰামথাঙি অনোঙি দ্বাৰাই কোচা খ্রীষ্টিয়ান আমায়দোনা যত্নমৗন অৗগ্রৗম মুষ্টি মায়ৰং লাওঙিদো তৗৰৗং লাওৱা। ৰাভা ব্যাপ্তিষ্ট চার্চ ইউনিয়নমৗন অৗগ্রৗম মিচিক আমায়দোবান ইউনিয়ননি উন্নতি গাসাইঙি কৗমাই যথেষ্ট হামসা গাসাইমৗন ফৗইতানা। ই মিচিক আমায় হাঞ্জাৱা আপ্রোক স্বতাং কৗম তৗৰৗইঙি গৗমৗন লাইতানা, স্বাধীন ভাবে অনোক উইভিং এণ্ড টেইলোৰিং ক্রাফট চেন্টাৰ তৱা। আৰা অনোকৗন মুঠাসা মায়ৰং পাইচোকৗইমৗন ইউনিয়ননা লাৱা। উ গসৗন সময়াই বৗসৗৰ দৗকৗন ইউনিয়নাইঙি মিচিক আমায়দো খৗব তৗক্রৗই বাজেটদো লাৱাইমৗন ঈশ্বৰনি পেনেম ক্রৌ প্রচাৰ গাসাইঙি কৗমাই সহায় গাসাইমৗন পাংতা।

৭। বৗন্তৗই-মিচালদোনি কৗমঃ

        ৰেভাঃ ৰোখামানি চেষ্টাই ১৯৬৯ চনাইঙি ১ নভেম্বৰ চিনিং আমলাইগুৰী কোচা সঙাই কোচা খ্রীষ্টিয়ান বৗন্তৗই-মিচাল হাঞ্জা জনম সাইমৗন তি ৫০ বৗসৗৰাই তালাম তৗপৌ ঈশ্বৰনি আশীর্ব্বাদৱাই।  ৰাভা ব্যাপ্তিষ্ট চার্চ ইউনিয়নাই বৗন্তৗই-মিচালদোবান চাপ্লাগ তালাম তি-তিমলৗইমৗন ইউনিয়ননি উন্নতি গাসাইঙি কৗমাই চেষ্টা গাসাইমৗন পাংতা। তি ই বৗন্তৗই-মিচাল হাঞ্জাদো আপ্রোক স্বতাং কৗম তৗৰৗই গৗমৗন চেকেঙাই লাঔ। অনোঙি অফিচ বিল্ডিং চৗদৗৰ তালা বানাই মানৌ ই সোনাসান চিনকাইঙি পালাইঙি সময়াই  নুগ্দুৰ গাদাওঙি সাইঙা অষ্ট্রেলিয়াইঙি ৰেভাঃ জর্জ ডব্লিউ স্তাৱছনি দ্বাৰাই। অনোকবান মিচিক আমায়দো গানা ইউনিয়ননা বাজেটদো লাওমৗন ঈশ্বৰনি পেনেম ক্রৌদো প্রচাৰ গাসাইঙি কৗমাই সহায় গাসাইমৗন পাংতা। ই বৗন্তৗই-মিচালদোৱৗন ইউনিয়ননি সৗম্প্রৗম ক্রেং আৰা ইউনিয়ননি উন্নতি গাসাইঙি কৗমাই ফৗইতোং দিনাইঙি টাংগাম অনোকৗন।

৮। স্কুলমৗন সেৱা কৗমঃ

        RBCU ৱাই তি মুঠ ৪ টা ইংৰাজী স্কুল তৱা। উদো সায়ৌ ১) মাউন্ট অলিভ স্কুল, দেবীতোলা, আসাম, ২) দ্বিপসিং একাডেমী, মেন্দাবাৰী, ৰাসানদু বেঙ্গল, ৩) মাউন্ট জায়োন স্কুল, কাছোমাৰী, গোৱালপাৰা, আসাম, আৰা ৪)  গ্লাসবী মেমোৰিয়েল স্কুল, আমলাইগুৰী, আসাম। ই স্কুলদোনি দ্বাৰাই ঈশ্বৰনি পেনেম ক্রৌ প্রচাৰ গাসাইঙি গসা লাম হিচাবাই তৗৰৗইমৗন পাংতা। আৰা স্কুলাইঙি টাকা-পৗশিমৗনবান ইউনিয়ননি উন্নতি গাসাইঙি কৗম আৰা প্রচাৰ গাসাইঙি ক্ষেত্রৱাইবান সহায় গাসাইমৗন পাংতা।

৯। গোৱালপাৰা ৰাভা ব্যাপ্তিষ্ট চার্চ ইউনিয়ননি মুং তালাইঙিঃ

         গোৱালপাৰা ৰাভা ব্যাপ্তিষ্ট চার্চ ইউনিয়ন, যিয়ো ১৯৬০ চনাই ৰেভাঃ গ্লাসবীনি দ্বাৰাই শ্বিলংঙাই ৰেজিষ্ট্রেচন গাসাইঙি সাইতানা উৱো এক্সপায়েৰ সাই গৗমৗন ৰি-ৰেজিষ্ট্রেচন গাসাই চৗইমৗন পিদান গসা মুং লাওমৗন ৰেজিষ্ট্রেচন গাসাইঙি সাইতানা, উ মুঙো সায়ৌ "ৰাভা ব্যাপ্তিষ্ট কনভেনচন" (RBC) বানাইঙি সাইতানা ২০১০ চনাই।

১০। ৰাভা ব্যাপ্তিষ্ট কনভেনচন (গোৱালপাৰা ৰাভা ব্যাপ্তিষ্ট চার্চ ইউনিয়ন) নি বাজেট লৌফাইতানিঃ

        গোৱালপাৰা ৰাভা ব্যাপ্তিষ্ট চার্চ ইউনিয়ন জনম সাইতানা ১৯৫৯ চনাইঙি ৬ মে তাৰিখৱাই। উম্প্রিং হাসতান আৱা ৰেভাঃ ৰোখামানি দিনাই ১৯৬৯ চনাইপ্রিং ইউনিয়ন বাজেট লৌঙি সাইতানা। পৰথম বাজেট সাইয়ৌ ৩,০০৮/- টাকা সৗন। উ সময় তৱা মাত্র কালভান্ধাৰী (১৯৫৯, ৬ মে) আৰা সাপকাটা মণ্ডলী (১৯৬০, ৪ ডিচেম্বৰ)। তি ৰাভা ব্যাপ্তিষ্ট কনভেনচননি বাজেট সায়ৌ ৪২২৭,৯৮৮/- টাকা (২০১৮-১৯)।

          ৰাভা ব্যাপ্তিষ্ট কনভেনচননি বয়স তি ৬০ বৗসৗৰ। তি লাগেত ৰাভা ব্যাপ্তিষ্ট কনভেনচননি চৗদৗৰাই মুঠ ৬৬ টা মণ্ডলী আৰা ৭ টা ফেলোশ্বিপ তৱা। তি লাগেত ৰাভা ব্যাপ্তিষ্ট কনভেনচননি পুমাই মুঠ পৰিয়াল সায়ৌ ২,৭৫২ ঘৰ। মুঠ মাৰাব ১২,৬৮৮ জন-জনী। মুঠ ব্যাপ্তিষ্ম মান্তানি ৯,৪৩৪ আৰা ব্যাপ্তিষ্ম মানৗইচান ৩,২৫৪ জন-জনী বর্ত্তমান পাষ্টৰনি সংখ্যা মুঠ  ১১ জন আৰা সাকসা প্রোঃ পাষ্টৰ। প্রচাৰক-প্রচাৰীকা ৩৫ জন-জনী প্রভুনি কৗমাই সহায় গাসাইমৗন পাংতা।

          বর্ত্তমান (২০১৯ ইং এপ্রিল) অফিচাৰ হিচাৱাই কৗমতৗৰৗইতোঙিদো সায়ৌ - শ্রী জুৱেল কুমাৰ মেজেম্ব্রাই, ৰুঞ্চুম টাংগাম, শ্রী সৰদাৰ ৰাভা, হাঃ ৰুঃ টাংগাম, ৰেভাঃ ইম্মানুৱেল বান্ধা, গদা কৗমন্যাচল, আৰা ৰেভাঃ ভেনুধৰ মেজেমব্রাই, ইজিকিউটিব কৗমন্যাচল।